諗住近近地去台中清境求其玩幾日，點知好好玩 😍 一月尾去氣溫比較低，十度或以下，日日藍天白雲空氣清爽。
民宿無敵山景好靚，不過完全冇暖氣，係另類體會😅 凌晨四點幾出發去睇日出，原來第一站係趁未天光去睇星，由海拔二千多米山頂望上天，覺得自己同星星月亮好近。
之後駛入太魯閣國家公園，沿途風景超靚，最後睇倒太陽好似一粒大鑽石從層層雲海之中升起，真係好讚嘆。不過朝早氣溫跌到去零下四度，腳趾喺雪靴入面都凍僵晒，睇多兩睇都要上返車。
去到先知原來清境有「小瑞士」之稱，我去過大瑞士就覺得兩個地方各有各靚，不過清境嘅消費就平好多。記得我之前去瑞士一星期，因為食物太貴，每日只係食酒店早餐加外面食一餐，好自然就進行斷食，無意中減肥成功。清境就唔同，我哋三個人每餐都唔睇價錢隨意叫餸，次次埋單都唔夠港幣$300 ，真係好感動。
今次係同屋企人去，媽咪喺香港長期有敏感咳，去到清境就一聲都冇咳過，超神奇！返嚟香港都冇咳幾日（不過一星期後又咳返），感覺上清境嘅山區空氣能醫百病，得閒都要再上一上去清下個肺。
返到嚟先知有好多朋友都去過清境，佢哋話夏天去就會成日落雨；冬天去就會好凍又冇暖氣，所以睇下自己點選擇啦😅
Instagram: hyatt.lam
Search